====== Псалтирь. Псалом 47 ======
  - [[old:ps:047:01|Псалом песни сынов Кореовых, вторыя субботы.]] 
  -  [[old:ps:047:02|Велий Господь и хвален зело во граде Бога нашего, в горе святей Его,]]
  -  [[old:ps:047:03|благокоренным радованием всея земли: горы Сионския, ребра северова, град Царя великаго.]]
  -  [[old:ps:047:04|Бог в тяжестех его знаемь есть, егда заступает и.]]
  -  [[old:ps:047:05|Яко се, царие земстии собрашася, снидошася вкупе:]]
  -  [[old:ps:047:06|тии видевше тако, удивишася, смятошася, подвигошася:]]
  -  [[old:ps:047:07|трепет прият я тамо, болезни яко раждающия.]]
  -  [[old:ps:047:08|Духом бурным сокрушиши корабли фарсийския.]]
  -  [[old:ps:047:09|Якоже слышахом, тако и видехом во граде Господа сил, во граде Бога нашего: Бог основа и в век.]]
  -  [[old:ps:047:10|Прияхом, Боже, милость Твою посреде людий Твоих.]]
  -  [[old:ps:047:11|По имени Твоему, Боже, тако и хвала Твоя на концах земли: правды исполнь десница Твоя.]]
  -  [[old:ps:047:12|Да возвеселится гора Сионская, и да возрадуются дщери иудейския, судеб ради Твоих, Господи.]]
  -  [[old:ps:047:13|Обыдите сион и обымите его, поведите в столпех его:]]
  -  [[old:ps:047:14|положите сердца ваша в силу его, и разделите домы его, яко да повесте в роде инем.]]
  -  [[old:ps:047:15|Яко Той есть Бог наш во век и в век века: Той упасет нас во веки.]]