====== Псалтирь. Псалом 68 ======
  -  [[old:ps:068:01|В конец, о изменшихся, псалом Давиду.]] 
  -  [[old:ps:068:02|Спаси мя, Боже, яко внидоша воды до души моея.]]
  -  [[old:ps:068:03|Углебох в тимении глубины, и несть постояния: приидох во глубины морския, и буря потопи мя.]]
  -  [[old:ps:068:04|Утрудихся зовый, измолче гортань мой: изчезосте очи мои, от еже уповати ми на Бога моего.]]
  -  [[old:ps:068:05|Умножишася паче влас главы моея ненавидящии мя туне: укрепишася врази мои, изгонящии мя неправедно: яже не восхищах, тогда воздаях.]]
  -  [[old:ps:068:06|Боже, Ты уведел еси безумие мое, и прегрешения моя от Тебе не утаишася.]]
  -  [[old:ps:068:07|Да не постыдятся о мне терпящии Тебе, Господи, Господи сил: ниже да посрамятся о мне ищущии Тебе, Боже Израилев.]]
  -  [[old:ps:068:08|Яко Тебе ради претерпех поношение, покры срамота лице мое.]]
  -  [[old:ps:068:09|Чуждь бых братии моей и странен сыновом матере моея:]]
  -  [[old:ps:068:10|яко ревность дому Твоего снеде мя, и поношения поносящих Ти нападоша на мя.]]
  -  [[old:ps:068:11|И покрых постом душу мою, и бысть в поношение мне:]]
  -  [[old:ps:068:12|и положих одеяние мое вретище, и бых им в притчу.]]
  -  [[old:ps:068:13|О мне глумляхуся седящии во вратех, и о мне пояху пиющии вино.]]
  -  [[old:ps:068:14|Аз же молитвою моею к Тебе, Боже: время благоволения, Боже: во множестве милости Твоея услыши мя, во истине спасения Твоего.]]
  -  [[old:ps:068:15|спаси мя от брения, да не углебну: да избавлюся от ненавидящих мя и от глубоких вод.]]
  -  [[old:ps:068:16|Да не потопит мене буря водная, ниже да пожрет мене глубина, ниже сведет о мне ровенник уст своих.]]
  -  [[old:ps:068:17|Услыши мя, Господи, яко блага милость Твоя: по множеству щедрот Твоих призри на мя.]]
  -  [[old:ps:068:18|Не отврати лица Твоего от отрока Твоего, яко скорблю: скоро услыши мя.]]
  -  [[old:ps:068:19|Вонми души моей и избави ю: враг моих ради избави мя.]]
  -  [[old:ps:068:20|Ты бо веси поношение мое, и студ мой, и срамоту мою: пред Тобою вси оскорбляющии мя.]]
  -  [[old:ps:068:21|Поношение чаяше душа моя и страсть: и ждах соскорбящаго, и не бе, и утешающих, и не обретох.]]
  -  [[old:ps:068:22|И даша в снедь мою желчь, и в жажду мою напоиша мя оцта.]]
  -  [[old:ps:068:23|Да будет трапеза их пред ними в сеть и в воздаяние и в соблазн.]]
  -  [[old:ps:068:24|Да помрачатся очи их, еже не видети, и хребет их выну сляцы.]]
  -  [[old:ps:068:25|Пролий на ня гнев Твой, и ярость гнева Твоего да постигнет их.]]
  -  [[old:ps:068:26|Да будет двор их пуст, и в жилищих их да не будет живый.]]
  -  [[old:ps:068:27|Зане егоже Ты поразил еси, тии погнаша, и к болезни язв моих приложиша.]]
  -  [[old:ps:068:28|Приложи беззаконие к беззаконию их, и да не внидут в правду Твою.]]
  -  [[old:ps:068:29|Да потребятся от книги живых, и с праведными да не напишутся.]]
  -  [[old:ps:068:30|Нищь и боляй есмь аз: спасение Твое, Боже, да приимет мя.]]
  -  [[old:ps:068:31|Восхвалю имя Бога моего с песнию, возвеличу Его во хвалении:]]
  -  [[old:ps:068:32|и угодно будет Богу паче телца юна, роги износяща и пазнокти.]]
  -  [[old:ps:068:33|Да узрят нищии и возвеселятся: взыщите Бога, и жива будет душа ваша.]]
  -  [[old:ps:068:34|Яко услыша убогия Господь, и окованныя своя не уничижи.]]
  -  [[old:ps:068:35|Да восхвалят Его небеса и земля, море и вся живущая в Нем.]]
  -  [[old:ps:068:36|Яко Бог спасет Сиона, и созиждутся гради Иудейстии, и вселятся тамо и наследят и:]]
  -  [[old:ps:068:37|и семя рабов Твоих удержит и, и любящии имя Твое вселятся в нем.]]