====== Псалтирь. Псалом 38 ======
  - [[old:ps:038:01|В конец, Идифуму, песнь Давиду.]] 
  -  [[old:ps:038:02|Рех: сохраню пути моя, еже не согрешати ми языком моим: положих устом моим хранило, внегда востати грешному предо мною.]] 
  -  [[old:ps:038:03|Онемех и смирихся, и умолчах от благ, и болезнь моя обновися.]] 
  -  [[old:ps:038:04|Согреяся сердце мое во мне, и в поучении моем разгорится огнь: глаголах языком моим:]] 
  -  [[old:ps:038:05|скажи ми, Господи, кончину мою и число дний моих, кое есть, да разумею, что лишаюся аз.]] 
  -  [[old:ps:038:06|Се, пяди положил еси дни моя, и состав мой яко ничтоже пред Тобою: обаче всяческая суета всяк человек живый.]] 
  -  [[old:ps:038:07|Убо образом ходит человек, обаче всуе мятется: сокровищствует, и не весть, кому соберет я.]] 
  -  [[old:ps:038:08|И ныне кто терпение мое? не Господь ли? и состав мой от Тебе есть.]] 
  -  [[old:ps:038:09|От всех беззаконий моих избави мя: поношение безумному дал мя еси.]] 
  -  [[old:ps:038:10|Онемех и не отверзох уст моих, яко Ты сотворил еси.]] 
  -  [[old:ps:038:11|Отстави от мене раны Твоя: от крепости бо руки Твоея аз изчезох.]] 
  -  [[old:ps:038:12|Во обличениих о беззаконии наказал еси человека, и истаял еси яко паучину душу его: обаче всуе всяк человек.]] 
  -  [[old:ps:038:13|Услыши молитву мою, Господи, и моление мое внуши, слез моих не премолчи: яко преселник аз есмь у Тебе и пришлец, якоже вси отцы мои.]] 
  -  [[old:ps:038:14|Ослаби ми, да почию, прежде даже не отиду, и ктому не буду.]]