====== Псалтирь. Псалом 79 ======
  -  [[old:ps:079:01|В конец, о изменшихся, свидение Асафу, псалом.]] 
  -  [[old:ps:079:02|Пасый Израиля вонми: наставляяй яко овча Иосифа, седяй на Херувимех, явися:]]
  -  [[old:ps:079:03|пред Ефремом и Вениамином и Манассием воздвигни силу Твою, и прииди во еже спасти нас.]]
  -  [[old:ps:079:04|Боже, обрати ны, и просвети лице Твое, и спасемся.]]
  -  [[old:ps:079:05|Господи Боже сил, доколе гневаешися на молитву раб Твоих?]]
  -  [[old:ps:079:06|Напитаеши нас хлебом слезным, и напоиши нас слезами в меру.]]
  -  [[old:ps:079:07|Положил еси нас в пререкание соседом нашым, и врази наши подражниша ны.]]
  -  [[old:ps:079:08|Господи Боже сил, обрати ны, и просвети лице Твое, и спасемся.]]
  -  [[old:ps:079:09|Виноград из Египта пренесл еси: изгнал еси языки, и насадил еси и:]]
  -  [[old:ps:079:10|путесотворил еси пред ним, и насадил еси корения его, и исполни землю.]]
  -  [[old:ps:079:11|Покры горы сень его, и ветвия его кедры Божия:]]
  -  [[old:ps:079:12|простре розги его до моря, и даже до рек отрасли его.]]
  -  [[old:ps:079:13|Вскую низложил еси оплот его, и обымают и вси мимоходящии путем?]]
  -  [[old:ps:079:14|Озоба и вепрь от дубравы, и уединенный дивий пояде и.]]
  -  [[old:ps:079:15|Боже сил, обратися убо, и призри с небесе и виждь, и посети виноград сей:]]
  -  [[old:ps:079:16|и соверши и, егоже насади десница Твоя, и на сына человеческаго, егоже укрепил еси себе.]]
  -  [[old:ps:079:17|Пожжен огнем и раскопан: от запрещения лица Твоего погибнут.]]
  -  [[old:ps:079:18|Да будет рука Твоя на мужа десницы Твоея и на сына человеческаго, егоже укрепил еси себе,]]
  -  [[old:ps:079:19|и не отступим от Тебе: оживиши ны, и имя Твое призовем.]]
  -  [[old:ps:079:20|Господи Боже сил, обрати ны, и просвети лице Твое, и спасемся.]]