====== Псалтирь. Псалом 91 ======
  - [[old:ps:091:01|Псалом песни, в день субботный.]]
  - [[old:ps:091:02|Благо есть исповедатися Господеви и пети имени Твоему, Вышний:]]
  - [[old:ps:091:03|возвещати заутра милость Твою и истину Твою на всяку нощь,]]
  - [[old:ps:091:04|в десятоструннем псалтири с песнию в гуслех.]]
  - [[old:ps:091:05|Яко возвеселил мя еси, Господи, в творении Твоем, и в делех руку Твоею возрадуюся.]]
  - [[old:ps:091:06|Яко возвеличишася дела Твоя, Господи: зело углубишася помышления Твоя.]]
  - [[old:ps:091:07|Муж безумен не познает, и неразумив не разумеет сих.]]
  - [[old:ps:091:08|Внегда прозябоша грешницы яко трава, и проникоша вси делающии беззаконие, яко да потребятся в век века:]]
  - [[old:ps:091:09|Ты же вышний во век, Господи.]]
  - [[old:ps:091:10|Яко се, врази Твои, Господи, яко се, врази Твои погибнут, и разыдутся вси делающии беззаконие.]]
  - [[old:ps:091:11|И вознесется яко единорога рог мой, и старость моя в елеи мастите:]]
  - [[old:ps:091:12|и воззре око мое на враги моя, и востающыя на мя лукавнующыя услышит ухо мое.]]
  - [[old:ps:091:13|Праведник яко финикс процветет: яко кедр, иже в ливане, умножится.]]
  - [[old:ps:091:14|Насаждени в дому Господни во дворех Бога нашего процветут:]] 
  - [[old:ps:091:15|еще умножатся в старости мастите, и благоприемлюще будут.]] 
  - [[old:ps:091:16|Да возвестят, яко прав Господь Бог наш, и несть неправды в Нем.]]