====== Псалтирь. Псалом 139 ======
  - [[old:ps:139:01|Изми мя, Господи, от человека лукава, от мужа неправедна избави мя:]] 
  - [[old:ps:139:02|иже помыслиша неправду в сердцы, весь день ополчаху брани:]] 
  - [[old:ps:139:03|изостриша язык свой яко змиин: яд аспидов под устнами их.]] 
  - [[old:ps:139:04|Сохрани мя, Господи, из руки грешничи, от человек неправедных изми мя, иже помыслиша запяти стопы моя.]] 
  - [[old:ps:139:05|Скрыша гордии сеть мне и ужы, препяша сеть ногама моима:]] 
  - [[old:ps:139:06|при стези соблазны положиша ми.]] 
  - [[old:ps:139:07|Рех Господеви: Бог мой еси ты, внуши, Господи, глас моления моего.]] 
  - [[old:ps:139:08|Господи, Господи, сило спасения моего, осенил еси над главою моею в день брани.]] 
  - [[old:ps:139:09|Не предаждь мене, Господи, от желания моего грешнику: помыслиша на мя, не остави мене, да не когда вознесутся.]] 
  - [[old:ps:139:10|Глава окружения их, труд устен их покрыет я.]] 
  - [[old:ps:139:11|Падут на них углия огненная, низложиши я во страстех, и не постоят.]] 
  - [[old:ps:139:12|Муж язычен не исправится на земли: мужа неправедна злая уловят во истление.]] 
  - [[old:ps:139:13|Познах, яко сотворит Господь суд нищим и месть убогим.]] 
  - [[old:ps:139:14|Обаче праведнии исповедятся имени твоему, и вселятся правии с лицем твоим.]]